Å vera langt unna

I forgårs høyrde eg eit foredrag av forfattaren Aage Storm Borchgrevik. Han fortalde om boka si om Anders Behring Breivik. I dag vil eg skriva diktet om denne hendinga som eg skreiv den dagen det hende..
Seinare laga eg eit bilde til dette diktet.

22.07.11

Eg sykla ned frå fjellet

for å snakka i mobil.

Me høyrde rykte om

det vonde.

Alle som var  døde.

Var det hundre?

Eg berre stod.

Med telefonen

i handa.

Lenge

Fjella er like bratte

og fossen durar

like sterkt.

Men set kryss

over tjueandre juli

Set kryss over.

Set kryss over.

Set kryss over

gjerningsmannen

og dei som har

leia han på vegen

og styrka han

 i galskapen.

Etterpå skal

tjueandre juli

leva inne i oss alle.

Brenna og

halda oss vakne. 

(ABM 25.07.11)