Lucia-tog og julekonsert

14.12.2013

I dag skriv eg to dikt.  I går 13.desember hadde eg to opplevingar som eg har skrive om. Klokka 0800 om morgonen var me og såg på Lucia-tog i Sævarhagen barnehage saman med Emira, eit barnebarn som går der. Klokka 1900 var me på julekonsert i Haus kyrkje på Osterøy. Eg voks opp i paktarhuset på prestegarden frå eg var 5 år til eg var 13 år. Kyrkja låg 100 m rett bortom prestegarden på vegen bort til Haus. 

Lucia-dagen kl 8

Lysfest i barnehagen

tidleg om morgonen

Små barn i kvite

klede og lys

i hendene

i rekkje og rad

så song dei for oss

om Jesu kome

og delte ut

varme bollar

Ein liten gut som

eg ikkje kjende

gav meg eit bilde

og heldt meg

i handa då me

venta på

Luciatoget

kanskje han kjende

seg litt tryggare då

han tenkte

sikkert ikkje på

at han gjorde meg

litt gladare. 

(ABM 14.12.2013)

Julekonsert i Haus kyrkje

Eg sit i kyrkja mi

frå barndommen

Heimanfrå paktarhuset

forbi prestebustaden

over den gamle

steinbrua

til kyrkja

Der leika me

hjelpte klokkaren

gjekk på søndagsskule

og til gudsteneste

kvar einaste julaftan

Kyrkja den same

fargane

preikestolen

og altertavla

Dei spelte og song

advent og jul og

to julesongar

av mor mi

Eg sat der med berre

gode ord

endåtil det inste

i meg sjølv

heldt fred og ro 

(ABM 14.12.13)