Dei tunge stundene kan delast på så mange måtar

Skriv til meg

når du er motlaus.

Når dagane dine er tunge.

Fortel meg kva

du tenkjer på

i det inste

av deg sjølv.

Så kan eg lesa

brevet ditt

og fella tårene dine 

(ABM 1983)

Tanken er tom

Ei stund sidan

eg har malt

bilde.

Eg kjem ikkje

i gang.

No er også

tanken tom.

Det eg skriv

gjev meg

ingen ting.

Å gå inn

i det inste

i meg sjølv

er tungt

og slitsomt.

Det har vore

slik før også.

Men trongen

til å dikta

og mala

dukkar fram att.

Til dess hentar

eg dikt frå

arkviet mitt. 

(ABM 29.04.2014)

Å ha det travelt

I dag har eg hatt

det så travelt

at tankane

mine har sovna

og hovudet

mitt er tomt.

Då går eg inn

til det inste

i meg sjølv

og spør:

-Kva har du

til meg i dag?

-La vinden blåsa

kvar han vil,

sa det inste

-Er det rett?

sa eg.

-Ja, det ser

slik ut.

Berre sjå deg

rundt i verda,

sa det inste

i meg sjølv. 

(ABM  28.04.2014)

Ei tilfeldig hending i livet

Eg følgde

harespor i går.

Haren tok

til venstre

og eg følgde

kvistane.

Hardangervidda

på ski.

I strålande sol,

skinande

snø og

blendande

ljos.

VM-smurning

ski og

stavar.

Langt ifrå

min kjære

fjord.

Men likevel

ein sjeldan gong.

Blikkstill vidde

nykvit snø

og gråe berg

I teatersalen før

dei stemmer i

dei stemmer i

det mektigaste kor. 

(ABM 26.04.2014)

Å tenkja seg om

Å tenkja sakte

er ein god vane.

Pytagoras

tenkte sakte.

Han tenkte ut

noko som sikkert

har vore nyttig

for mange.

Å tenkja fort

er ei øving i å

tenkja på seg sjølv.

Etterpå er det

tomt etter dei. 

(ABM 26.04.2014)

maskeball

om morgonen

tar eg

maska mi på

og går ut i det

skinande

mørke ljos

på skalldyr-

marknaden

handlar eg

alt det eg treng

så går eg heim

og tar av meg

maska

ei lita forunderleg

stund

etterpå trekkjer eg

silkehanskane på

og rivnar

maska sund. 

(ABM 25.04.2014)

Ei kald skulder

-Eg gjev deg

ei kald skulder,

sa ho,

og kastar deg

ut i kulden.

Det er vel det

verste som

kan skje.

Ei kald skulder

ute i kulden.

Der frys eg

og tennene

klaprar.

Tenk om ho

hadde sagt:

-Eg gjev deg

ei varm skulder

og kastar deg

ut i varmen.

Det hadde vel

vore flott.

Men kanskje

ikkje så flott

om eg budde

i Saharaørkenen. 

(ABM 24.04.2014)

symjeturen

i dag tar eg

våtdrakta på

symjeføter

snorkel og maske

så sym eg langs

berga og

ser på det

yrande livet

nedi sjøen.

kvar plante

kvart dyr og

kvar fisk

har alt dei

treng for å

livberga seg

i det kalde

vatnet. 

(ABM 23.04.2014)

Sommarvarme i april

Det er kanskje

ikkje så lurt

likevel med

sommarvarme

i april.

Tenk om det kjem

to frostnetter

i mai.

To skikkeleg

kalde.

Slik tenkjer eg.

Skjer det noko

godt

reknar eg

automatisk

med at eg blir

straffa for det.

Ulukker vil skje

og vonde ting

vil henda.

Lurer på om

det er råd

å slutta å tenkja

slik.

Berre seia

-No har me det

godt, kjære. 

(ABM 22.04.2014)

Pust i bakken

21.04.14

Pust i bakken

-Me tar ein

pust i bakken,

sa dei

når øktene

blei lange.

Dei arbeidde

jamt og trutt.

-Me tar ein

pust i bakken.

Dei måtte gå

lenge for å nå

fram.

-Me tar ein

pust i bakken.

Dei kvilte

og snakka

saman.

No seier ingen

-Me tar ein

pust i bakken.

Alle har travelt

og hastar

i veg.

Det er ikkje

stunder til å ta

ein pust i bakken. 

(ABM 21.04.2014)

Hamre kyrkje. Nyårsnatta 1900

Hamre kyrkje

frå 1600

kyrkjestad

frå 1100

mange

generasjonar

i går vitja eg

gravene til nokre

av forfedrane mine

ein ljos og stille

første påskedag

og eg tenkte på

nyårsafta i året

1900

etter midnattsmessa

markerte skifte til

eit nytt hundreår

folket gjekk i

robåtane sine

for å fara heim

vågen full av båtar

i ein båt stemnde

dei opp

-vår gud han er

so fast ei borg

alle song med

og salmen tona

under den vide

himmelen

ei mektig hending

ho lever på

folkemunne så lenge 

(ABM 20.04.2014)

oppstoda, livet og den første påskedag

barnelærdom

me lærte det

på skulen

i kyrkja

ord eg ikkje

forsto

oppstoda og livet

eg vart eldre

men orda var like

uforståelege

dei sa

-du må tru så hardt

at du trur du forstår

du må tru så hardt

at du gjer alt

me ber deg om

seinare har eg lært

at dette er

viktige ord

i alle truer

du må tru så hardt

at du gjer det

me ber deg om

endåtil når me

ber deg gå

lidingsvegen

vegen til

himmelen 

(ABM 19.04.2014)

Vindebrua

Borger og byar

hadde vindebru.

Når fienden kom,

heiste dei opp

vindebrua og

stengde seg inne.

Eg spurde:

-Korleis går det

med deg?

Han såg på meg.

heiste opp

vindebrua

og sa ingen ting.

Eg heiste opp

vindebrua

og for inn til

det inste i

meg sjølv

og ville finna

forklaring.

Det fann eg ikkje.

Då firte eg

vindebrua,

gjekk ut,

smilte og sa:

-No er eg

her igjen. 

(ABM 18.04.2014)

Minnedag

Denne tidlege

morgonen

er verda ung og ny.

Sola skin på

fjella over fjorden

slik som då

eg var liten gut.

Desse tidlege

sommardagane

med far min

og mjølka kyrne.

Sola skein på

fjella over fjorden.

eg var sju år.

på same staden

sit eg no

og diktar meg

tilbake

eg fyller sytti år

i sommar

og det var ein slik

grytidleg

sommarmorgon

det ljose solskinet

kyrne som

ruggar hovudet sitt

mot meg

far min sit og

mjølkar

og eg er heilt trygg.

Det er noko

alle desse åra

imellom

eg ikkje får tak i.

Eg skal leita

etter det. 

(ABM 17.04.2014)

Ein merkverdig dag

16.04.14

Ein merkverdig dag

Det er

merkverdig

at fuglen min

kjem att

år etter år.

No sit han

i treet sitt

slik han alltid plar

gjera

når han kjem.

Om litt

kjem ein fugl til

og så ordnar

dei reiret sitt

under mønet

på uthuset.

Eg tenkjer på

kor langt han

har floge

for å koma heim.

Eller kanskje

er det om hausten

han flyg heim.

Då er han på

ferie her

og ser glad ut. 

(ABM 16.04.2014