Tonen frå Nordsjøen

Rytmen frå Nordsjøen

det grunne havet

og dei hoggande

bølgjene

ein djup grunntone

i uroleg hast

og innimellom

lav buldring

nordsjøtonen er

der ein stad

eg kjenner han i

heile meg

når eg ligg utpå

sjøen og fiskar. 

(ABM 31.10.2013)

Å gløyma er alt som skal til

Du gjekk frå meg

ein sommar morgon.

Å gløyma er alt som skal til.

Dei kriga mot kvarandre

i krigen.

Å gløyma er alt som skal til.

Dei brente bøkene

 på bålet.

Å gløyma er alt som skal til.

Men ordet om det som hende

 går vidare

opp liene

utover havet

langs strendene

og mellom alle folk 

som 

trudde at å gløyma

er alt som skal til. 

(ABM 30.10.2013)

Når guden Mammon styrer og steller

I forgår kom eg heim frå

Kroatia og Montenegro

Eg har gått på festningsmurane

i Dubrovnik

og gjesta gamlebyen

innanfor murane.

I Monte Negro har eg sett

restane av eit hus

frå romartida.

Guiden fortalde og

fortalde

om romma

om livet der

om dei fantastiske golva

med bilde og fargar.

Guiden i Kotor fortalde

om livet og bygningane

i gamlebyen og om

festningsmurane frå

sjøen og høgt oppi fjellet.

Det var ei ære og ei glede

å vitja desse stadene.

litt av vår eiga historie

er også der.

Så kom eg heim

og las i avisa at torsdag

kunne folk besøkja den

tidlegaste buplassen

dei har funne på Stord

nærare 10 000 år gammal.

-Du kan koka maten din i

den gamle eldstaden,

seier arrangøren.

Så skal buplassen

 øydeleggjast

Det er visst plass til ei tomt

 eller to.

For nærare 10 000 år sidan

budde det folk der

laga mat

sov om nettene

arbeidde om dagen

hadde minnestunder

om forfedrane sine

og ba til gudane.

På Stord i 2013

jamnar dei historia vår

til tomteland

og ber til

guden Mammon. 

(ABM 29.10.2013)

Kva er skilnaden

28,10,2013

Det gjekk ei gammal

dame og tigga

framfor porten til

gamlebyen i Kotor.

-Sigøynar,

sa guiden vår.

Dei er her om sommaren.

om vinteren veit ingen

kvar dei blir av,

sa guiden vår.

Han kunne like godt

sagt det om oss.

Me reiser også til

Kotor om sommaren.

Om vinteren veit dei ikkje

kvar me blir av.

Eg trur eg sluttar

reiseskildringane no.

Eg har opplevd mykje,

men truleg sett lite. 

(ABM 28.10.2013)

Tidene er som dei er

27.10.2013

I april 1964 song

Asbjørn og Henryen

med i allsongen

-øll øll og mere øll-

så det ljoma i

hytta på Kvamskogen

i Noreg

25. oktober 2013

spelte musikantane

ved borda i

restauranten i

Dubrovnik

Ved bordet vårt song dei

-øll øll og mere øll-

til stor jubel

Det var stor stemning

og ein gild kveld i den

lokale restauranten.

Eigentleg er det

ikkje langt frå det

gode landet Kroatia

og til gamle Noreg. 

(ABM 27.10.2013)

Livet er både det eine og det andre

26.10.2013

Når smertene set seg fast

høyrer eg ingen ting

ser eg ingen ting

føler eg ingen ting

det er berre desse

stormande smertene

slik hjelper du meg

min gode ven

når du besøkjer meg

snakkar med meg og

trøystar meg.

Pussig nok tenkte eg dette

då eg sat og såg øya

vestanfor Dubrovnik

i morgonsol

med fiskebåtar i

sundet og eit

turistskip gjekk forbi. 

(ABM 26.10.2013)

Vent litt til

25.10.2013

I dag må eg finna

noko anna å ta meg til.

Ryggen har svikta meg.

Det blir ein dag ved

symjebassenget

saman med boka

Zahir av

Paulo Coelho.

Men eg ligg i ro

og ventar og ventar.

Kanskje må eg

venta litt til. 

(ABM 25.10.2013)

I dag reiste me til Monte Negro

24.10.13                                                                                                                  

Me ville sjå den

vidgjetne byen

Kotor

På vegen for me

framom ein nedlagt

militærleir med

rustne kanoner

tomme og skrøpelege

bygningar

Litt etter kom me

til Kotor

Festningsmurane var

velhaldne

og det yrte av liv

i gamlebyen

der inne

Festningsmurane

strekte seg frå hamna

og opp til dei

høgaste fjell

over 1000 trappetrinn

og høge murar.

Eg lurte på kven

som hadde laga

murane oppe i dei

stupbratte berga

Eg lurte på kven

som hadde bore

mat til dei

sement og steinar

Mest tenkte eg på

at Monte Negro

kanskje hadde

lagt bort krigen

men tok vare på

dei historiske

minnesmerka sine. 

(ABM 24.10.2013)

I dag las eg om Monte Negro

23.10.2013

Monte Negro

dei svarte fjella

restar etter mange

sivilisasjonar

dei tok seg til rette

den eine etter

den andre

berre ruinane er att

etter romarane

eg les om det

og tenkjer på det. 

(ABM 23.10.2013)

Bølgjene slår mot stranda

22.10.2013

Eg såg deg i den siste

lyse kveldstimen

og så var du borte

i skumringa på

stranda.

Eit menneske

kva tenkte du på

var du lei deg

eller var det gode tankar

Det veit eg ingenting om

og ikkje fekk eg spurt

deg heller

Men bølgjene slår mot

strendene som før

 (ABM 22.10.2013)

Dei blankslitne trappene og den høge festningsmuren

I gamlebyen i Dubrovnik

er trappa blanksliten.

den eine etter den andre

skiftande tider

dei og dei andre

gjennom hundrevis

av år

me går alle på den

blankslitne trappa vår

ofte utan at

me veit om det 

(ABM 21.10.2013)

Dagen gryr

20.10.2013

Dagen gryr over

Adriaterhavet.

Krigen var lang og hard.

Fiskaren ligg uti

sundet

Krigen var lang og hard.

Den eine mot den andre.

Han som vann fortalde

historia.

Krigen var lang og hard.

Han som tapte krigen.

sa han berre ha det

og gjekk heim.

Krigen var lang og hard. 

(ABM 20.10.2013)

Pussig kva

Hei
No har eg vore ei veke i Kroatia. Ein dag var me i Monte Negro. No får du nokre glimt frå denne turen, dag for dag. Me reiste ned der den 19.10.2013 og kom fram om kvelden. Eg har alt skrive eit innlegg frå den 19.10.2013 før me reiste. No får du eit nytt.

19.10.2013

I går kveld såg eg månen

strålande vakker og stor

over Hardangerfjord.

I dag ser eg månen

gulblank og strålande lik

over gamle Dubrovnik.

Månen

Den same som han var

i går og i dag. 

(ABM 19.10.2013)

Skulder ved skulder

Flyttfuglane har floge

til varmare land.

Dei standhaftige fuglane

er her heile året.

dei står skulder ved

skulder

og sturer

dei tenkjer på

den lange vinteren

og slitet med å finna mat.

Akkurat no har eg

også lyst til å

stå skulder ved

skulder

og stura fram

mot vinteren 

(ABM 19.10.2013)

Pust i bakken

I dag er det is på

bilrutene.

Det er langt

til våren.

I mellomtida

er det regn og slaps

og snø og is

i vente.

Det er mørke til

langt på dagen

båten er på land

det er bekmørkt

om kvelden.

Men inne kan me

tenna stearinlys

leggja meir ved

i omnen

ta på oss varme

klede

og gå ut i regnet.

Me kan tenkja

tankane våre

med regn i andletet

Så går me heim

i varmen og

snakkar litt med

kvarandre

(ABM 18.10.2013)

Den sakte modige

  

Den sakte modige står

i måneskinn

og nordanvind.

Han uler ikkje

mot månen

han skrik ikkje

mot vinden.

Han luter seg

innover i seg sjølv

og seier ikkje

så mange ord.

Han er berre der og

held handa mi når

eg har vonde dagar

når livet er

vrient og vrangt

og snur det

andre kinnet til.

Då er du der min

sakte modige venn. 

(ABM 17.10.2013)