Den motsette tanken

Når eg verkjer

og lir vondt.

Frå det inste

i meg kjem

dei tunge orda.

Eg orkar ikkje meir.

Ropar ut

skrik

og uler.

Eg ser mørke

kvar eg snur meg.

Mot desse  usle

maktene.

Dette klarar eg.

Eg gler meg til

eit TV-program

Ein tur med båten

Lange gode

kveldar

i peisestova.

Eitt steg om gongen.

Framover.

Det er ikkje lett

å sjå kva ord og tanke

som kjem til

å vinna. 

(ABM 31.03.2014)

Kysttonen

Gje meg ein tone frå fjorden så blå.

Berga og sjøen er meg så inderleg nær.

Gje meg ein tone, la bølgjene slå

Djupt inni skuggen av strendene her.

Gje meg tonen frå fjorden i kveld.

Då kan eg dikta om folket her vest.

Bølgjene slår mot den brattaste stein.

Rytmen og orda lagar til fest.

Tonen går gjennom marg og bein

Gje meg tonen frå fjorden i kveld. 

(ABM 30.03.2014)

Dagen går mot kveld

Fargar havet raudt

Sola sig og dagen eldest

Lufta vaker daudt

Ljoset skimrar imot kveld

Fisken vaker opp så vidt

Fuglen tagnar no i li og hell

Denne vakre gode dag

Gjer meg blid og nøgd

Til kvelden når me sit i lag

(ABM 28.03.2014)

Latsabb

-gjer dette og dette

seier eg

-nei eg gadd ikkje

svarar du

-latsabb

seier eg

etterpå tenkte

eg med meg sjølv

kven er det som

har lært ungdomen

min at han berre

treng gjera

kjekke ting

sky dei brysomme

og vanskelege og

strevsomme

oppgåvene

så kom eg på

at det er eg som

 lærte han det. 

(ABM 28.03.2014)

Den finaste dagen

I dag er det

strålande vårver.

Eg føler meg

utolmodig og

uroleg.

Eg vil leggja bort

det daglege

strevet.

Eg vil gjera

noko anna denne

finaste dagen.

Ein lang skitur

innover liene

og dei slake

skråningane

i lysande ljos.

På sjøen i

fiskebåten

blikkande stilt

og urørleg.

Sitja på berget

og høyra

måsane skrik. 

(ABM 27.03.2014)

Den du aldri møtte

Du står

på perrongen

når toget går.

Eg ser deg gjennom

togvindauga.

Eit kort sekund.

Augo møtest

og kjenner

kvarandre att.

Sjølv om me aldri

hadde sett

kvarandre før.

I dette glimtet

fanga me noko.

Me visste det.

Eg har sett etter deg

alle dagar seinare.

Og eg vil kjenna

deg att. 

(ABM 26.03.2014)

Samling i bånn

I dag er veret

fint og eg vil

Ta samling

i bånn.

Tenkja på dei

store ting i livet.

Sjå utover sjøen

og fjella.

Det tindrande

ljoset.

I går var eg

og besøkte

oldebarnet mitt.

Ørlite knøtt.

Som skal veksa

og få tankar

og ord.

Fortelja meg om

båten og

-sjå fuglen

oldebesten.

Dette tenkte

eg på i dag og

var glad

heilt inni det

inste i meg. 

(ABM 25.03.2014)

Aprilver i mars

I dag tidleg regna det

så hagla det

og no skin sola.

Våren er litt

for tidleg ute

det er godt også

vitnar om ein

lang sommar.

Ljoset

grønfargen

regn og sol

og så alle

blomane

i hagen.

Eg kjenner at

det blir bra. 

(ABM 23.03.2014)

Litt av hagen vår.

Å finna det rette ordet

Eg bomma

i dag igjen.

Eg bomma

på det første ordet.

Eg bomma

på det andre ordet.

Så snudde eg meg

og tenkte meg om.

Så sa eg

det tredje ordet.

Men då hadde

du gått din veg.

 (ABM 22.03.2014)

Skummelt

Det er skummelt

å spørja om noko

eg ikkje veit.

Det er skummelt

å sei ha det når

eg må gå.

Det er skummelt

å gå inn i

eit tomt hus.

Det er skummelt

å svara på

spørsmålet ditt.

Dersom eg veit

svaret,

skal eg ropa og

klappa og

klemma

rundt deg. 

(ABM 21.03.2014)

Skotpremie

Før var det skotpremie

på enkelte dyr og fuglar.

Det er mykje slutt på det.

No er det skotpremie

på terroristleiarar.

For å spara mykje

død og liding.

Tenk om det hadde vore

skotpremie på

Adolf Hitler i 1933,

eller Stalin

eller Pinochet

eller eller

Kor mange menneske

vore spart for

liding og død.

Det eine livet

og det andre

er vel like

mykje verd

heiter det i

barnelærdommen.

Men det er heilt

til dei ærgjerrige

rå og brutale

får kloa i oss.

Slike som gjer

vondt for

dei andre og

godt for seg sjølv.

Finn dei og set

skotpremie på dei. 

(ABM 20.03.2014)

Fiskesuppe

Ein lukkeleg dag

er å fiska

to palar og ein lyr

koka dei sprelande

ferske

fiskekrafta til

fiskesuppe

smeltar smør

med kveitemjøl 

rører fiskekrafta i

rekekraft oppi

kokar i fem minutt

med gulerøter

smakar til med

mjølk

fløyte

rjome

krydder

og fiskebuljong

serverer med

den kokte fisken

reker

blåskjell

og ferskt brød.

Dagen er ikkje

den same etterpå

ung og ny

(ABM 19.03.2014)

Å vera ulike

Det inste i meg

uler når eg møter

dei andre

dei som er ulike oss.

Månen er i ne

og ljoset lyser med.

Det inste i meg

seier redsel for

dei andre

som er ulike

endå verre

uler det.

Månen er i ne

og ljoset lyser med.

Eg skubbar det

inste attende og

bestemmer meg for

at det er viktig

å vera ulik

det skaper framsteg

og ei rikare verd

det ropar eg frå

alle fjelltoppane.

Månen er i ne

og ljoset lyser med. 

(ABM 18.03.2014)

vandrefalken

kvilelaust

under himmelen

stuper lydlaust

ned med

umåteleg presisjon

og fangar

ei skogmus

ein fuglunge

eller eit forvilla

menneske

 

sommarlufta

er den same

for alle

ljoset

dei sildrande

solstrålane

og stjernene

på himmelen 

(ABM 17.03.2104)

dei usynlege

det var ingen som

såg at eg gjekk

det var heller ingen

som såg at eg kom

attende

å vera einsam i eit

mylder av folk

er verre

enn å vandra

åleine i den

store ørkenen

der har du

ljoset

den varme

sanden

den vide

himmelen

å vera einsam

mellom mange

folk

er fælsleg 

(ABM 16.03.2014)

Det er kunst på veggane

det er kunst på veggane

på denne skulen

du kjem inn hovuddøra

og inn i fellesrommet

med kunst på

veggane og

under taket

i fellesrommet er

det stolar og bord

og biblioteket

å vera her

oppleva kunst

og bøker

gjer noko med deg

og livet ditt

du vert motigare

og dristigare

når du skal ta

fatt på dei tunge

oppgåvene. 

(ABM 15.03.2014)