Eg maler den gode dagen

Eg sit med den gamle malarkassen min

og tenkjer på om eg skal mala dagen din.

Er du trist og lei deg eller nøgd og glad.

Har du det travelt eller har du det bra.

Eg trur eg vil mala den gode dagen din nå.

Gnistrande gul med mørke strekar og lyse grå

med sol og sommar og blank og fin,

sit du i ljoset med kjæraste venen din.

Eg ynskjer at alle stundom kan ha det slik

at tida står stille i ei solvarm og fredeleg vik.

Du tenkjer på ingen ting, har berre ro og fred.

Du ligg der heilt roleg til sola går ned. 

(ABM 28.02.2014)

Historia startar nett no

-Historia magistra vitae,

fortalde den gamle

historielæraren.

-Det er latin,

sa han.

-Kva tyder det,

spurde eg.

-Historia lærer

oss om livet,

sa han.

-Ja, men då må

historia starta nett no,

sa eg.

Berre då kan eg

hugsa kva som har

skjedd.

-Du er ein klok gut,

sa den gamle

historielæraren. 

(ABM 27.02.2014)

Dei maktsjuke

Dei hissar seg opp.

Dei maktsjuke.

Dei same til

alle tider.

Den maktsjuke

har alltid rett.

Alle dei andre tar feil.

Rasar og slår

bestemmer og rår.

I vindauga mot verda

er dei der

Dei maktsjuke.

I fotefara deira

er det liding

og død.

Dei trampar

og går og

bryr seg ikkje.

Dei kjem igjen og igjen.

Dei saktmodige

og milde

når ikkje fram. 

(ABM 26.02.2014)  

Å vera midt i

Når vinden bles.

På trygg avstand.

Naturkreftene

som på ein film.

Trea bøyer seg

og bølgjene slår

med kvite toppar

mot land.

Når du står

midt i vinden

ruskar han i deg,

Bøyer og slit deg.

Du står midt i mot.

Alt du klarar.

Med alle

kreftene dine.

Å vera tilskodar

er ein ting.

Å vera midt i

er ein heilt

annan ting.

Det lærer historia

oss kvar dag. 

(ABM 25.02.2014)

Eg kjøper meg ein tidleg vår

Påskeliljene i hagen er gule alt

og gjev meg ei kjensle av vår.

I dag burde det vore hustrig og kaldt.

Men veret er nokså uvanleg i år.

Kanskje seier eg opp abonnementet mitt

på vinter og snø med kulde og is

og kjøper meg ein tidleg vår om litt,

ei påskelilje og litt ljosgrønt bjørkeris.

(ABM 24.02.2014)

Fem mils løpet

Å tenkja ei heil

fem mil på ski

er ein lang og

slitsam tanke.

Å tenkja

ein motbakke

om gongen

er ein kort og

lettare tanke.

Du møter kvar

motbakke.

Kliv oppover.

Så skrir nedover.

Då smiler du.

Så kjem ein ny

motbakke.

Alle desse

motbakkane.

Ei heil fem mil.

Å tenkja på heile

livet

er ein lang og

slitsam tanke.

Å tenkja ein dag

om gongen

er ein kort

og lettare tanke.

Kvar dag har sin

motbakke som

du kliv.

Kvar dag har

nedoverbakkar

Då skrir du og

smiler til

kvarandre.

Alle desse dagane

er livet ditt. 

(ABM 23.02.2014)

Bakom fasaden

Eg kjenner deg

bakom fasaden.

Der fann eg noko

som eg ikkje

visste om.

Før trudde eg

det var tomt og

aude.

Men under isen

var det eit

yrande liv.

Det var vinter

og kaldt.

Bakom dei morke

og svarte

veggane

var det strålande

ljos, smil

og latter.

Eg såg du sat der

med attlatne augo.

Men eg visste

at bakom fasaden

såg du på meg

og smilte. 

(ABM 22.02.2014)

Det skulle ha vore skotpremie på slike

Det var skotpremie

på skadedyr

då eg var liten,

så som rev,

kråke, trost

og mink.

Dei gjorde skade

for dyr og

menneske og

eg var redd

for lammet mitt.

Av og til lurer eg på

kvifor det ikkje er

skotpremie

på dei verste

skadedyra.

Dei som piner

og drep andre

menneske.

Dei fyller

gravlundane og

konsentrasjonsleirane. 

(ABM 21.02.2014)

Villepletreet

I den tette skogen

såg eg eit

villepletre.

Eg leita etter

gamle hustufter.

Men ingenting.

I ei vik såg eg

steinar etter

eit gammalt naust.

Eg lurte på

kven som hadde

budd der.

Kva snakka

dei om

med kvarandre.

Kva tenkte

dei på.

Smilte dei

 når dei såg

ljoset over fjorden.

Gjødsla dei

villepletreet

og gledde seg

til epla om hausten.

No er det berre

villepletreet att.

Men det

minner meg om

noko eg burde

tenkt på

og tatt vare på. 

(ABM 20.02.2014)

Livet og dei mange fargane

Eg vil mala

dagen blå og raud.

Annleis.

Då vil eg kanskje

oppdaga nye

ting med meg sjølv

og med dei andre.

Bryta opp og

endra.

Ser med nye

auge

og høyrer med

nye øyre.

Skapa eit

rikare liv.

Som har vore der.

Men eg såg

det ikkje

før det nesten

var for seint. 

(ABM 19.02.2014)

Me kan ikkje gjera noko med det

Våren dukkar opp

før me anar.

Vinteren for forbi

utan å vera vinter.

Det er i grunnen

annleis enn det plar.

I dag ligg det

to båtar på

fiskeplassen

som eg likar best.

Det er i grunnen

annleis enn det plar.

Men det er ikkje

så farleg.

Kvardagane

kjem og går.

Eg møter dei

uansett.

Med glede og

interesse. 

(ABM 18.02.2014)

Det er lite som skal til

Det er velplassert

når sola skin opp

på ein elles grå dag.

Det gir eit løft og

eg vert litt gladare.

Det er velplassert

når fisken nappar

og det er kaldt

og surt i båten.

Det gir eit løft

i ein grå kvardag.

Det er velplassert

når du smiler til meg

og det er heilt uventa.

Det gir eit løft og

eg kjenner meg

lysare til sinns. 

(ABM 17.02.2014)

Me gjer det ettertrykkeleg

I det tidlege ljoset

om morgonen

med ljåen og riva

i mitt niande år.

-Me gjer det

ettertrykkeleg,

sa far min.

-Kva er

ettertrykkeleg?

spurde eg.

-Det er betre enn

skikkeleg,

sa far min.

Alltid etterpå

når eg skulle

gjera viktige ting,

tenkte eg med

meg sjølv

eg gjer det

ettertrykkeleg.

 (ABM 16.02.2014)

Liten gut

Syng meg ein tone når kvelden er nær.

Syng for meg kjære i morgongry.

Takk for den tida du var meg kjær.

Gled deg kvar stund når dagen er ny.

Ver du mi trøyst når det stundar til

at du går frå meg når dagen lir

at du gjer det om når det er det du vil,

og eg tek med glede imot det livet gir. 

(ABM  15.02.2014)

Kven er fri, like verdig og bror

Eg lurer ofte på

mange ting.

I grunnlova t.d.

snakkar dei om

fridom

likskap

og brorskap.

Eg lurer på kven

som er meir

frie

enn andre

kven er meir

like verdige

enn andre

kven er meir

brør

enn andre.

Eg lurer på

om det er i mitt

fedreland.

dei sender ein

ungdom til

eit framandt land.

Han har budd her

 fjorten år

Dei seier at han

er ikkje

verdig til å

bu i landet vårt

han er ikkje

vår bror

han har ikkje rett

 til å vera så fri som oss.

Eg lurer på

kva grunnlov

me feirar. 

(ABM 14.02.2014)