Kva tenkjer du på når du les dette?

Ein ungdomsskuleelev i 9. klasse fortalde at dei skal ha prosjekt om Afghanistan denne veka. Eg fortalde om Drageløparen. Forfattaren fortel om oppveksten i Kabul. Dei måtte rømma til USA, men minna om livet i Kabul då han vaks opp, var med han - og heilt tydelege. Eg fortalde han også om granateplehagane rundt Kandahar og om korleis det hadde gått med dei.

I dag vil eg dela eit dikt som eg skreiv etter avslutninga til Stord ungdomsskule i 2009.

I går var eg på avslutning

for tiendeklassingane.

Dei gledde oss alle med

spel, song og dans.

Så fekk dei vitnemåla sine.

Mens eg sat der,

kom eg til å tenkja på

granatepla i Afghanistan

dei beste granatepla i heile verda

i skråningane rundt Kandahar

strålande blomeprakt

om våren

og glade menneske

som plukka epla om hausten

så kom krigane

og no er granateplehagane fulle av

bomber og granatar

Tenk om, tenkte eg. 

(ABM  19.06.09)