Kontingenten

Det ljosnar om morgonen.

Og eg hentar avisa inn.

Kontingenten er betalt.

 

Eg går på møte om kvelden.

Og høyrer interessante ting.

Kontingenten er betalt.

 

Eg fangar orda om dagen.

Og sorterer dei til kvelds.

Kontingenten er betalt.

 

Eg kviskrar til deg gode ord.

Skal me sjå på månen no i kveld?

Kontingenten er betalt.

(ABM 29.01.2018)

Omvegane

Den beine vegen fram.

Enkel og fin.

Og eg får eit velforma liv.

 

Men det er omvegen

rundt vatnet i kveldsol.

Sakte og vinden krusar

små bølgjer

 

Eller omvegen når

toget er forseinka

og eg sit på perrongen

og snakkar med deg

Kvar kjem du frå.

Bur det mange folk der.

 

Omvegen om sjukehuset.

Eg vil sjå til deg.

Korleis går det.

Du er snart frisk att.

Då dreg me på fisketur

i båten min.

 

Det er omvegane i livet

som gjer livet rikare

og som gjer deg gladare.

(ABM 25.01.2018)

                                          

Den gode angen

Eg minnest

lukta av tang og tare

og sjø og hav.

Den er i meg

først og sist.

 

 

Eg minnest lukta

av kyrne våre

når eg kom inn i fjøset

om morgonen.

Den er i meg

først og sist.

 

Eg minnest

den gode angen

langt inne i meg sjølv.

Fortel om noko

uforanderleg.

 

Den gode angen

er der sjølv om livet

er stridt og vondt.

(ABM 24.01.2018)

Redsle er så mangt

Skuggane i hagen min

puslar og rører seg.

Eg kvepp til kvar gong.

Det er mørke kveld

og vind frå sjøen.

Ingenting å vera redd for

 

Skuggane av folk i den

travle gata

skundar seg forbi.

Det er mørke kveld

og eg veit ikkje.

Ingenting å vera redd for

 

Skuggane av ord i det

inste i meg

skifter og blinkar opp.

Det er mørkt der inne.

Eg veit ikkje kva som

kjem fram

Eg frys og stramar til.

Og kvir meg til

å opna dagen.

(ABM 23.01.2018)

Vintermorgon

Når morgonen vaknar

ein vinterdag,

kjem du sakte etter.

Med god tid og lang frukost

lysnar det ute.

 

Den lange dagen.

Dersom du vil at

noko skal skje,

kan du på deg ta

gode klede og gå ut

i regnet og i vinden.

Stilla deg opp på stranda

og sjå vinden kastar opp

kvittoppa bølgjer.

Måsane heng høgt

oppe i lufta

med utspila venger.

 

Det skjer ingenting.

Alle held pusten

og lurer på om

våren kjem i år også.

(ABM 22.01.2018)

                                          

Vinden kan snu

Eg sit og malar eit bilde.

Den mørkaste sky

eg får til.

 

Eg ser inni mørket

langt inn i meg sjølv.

Eg rugar på svarte tankar.

 

Då finn eg fram dei lyse

og gladtona fargar.

Kvite og gule og raude

og blå.

Dei hopar seg opp

på den svartaste sky

og lyser og blenkjer

på lerretet mitt.

 

Då jublar eg høgt.

Kva har eg fått til.

Den mørkaste sky

kan gøyma langt

bak i seg sjølv

dei glade og skiraste fargar.

 

Då har eg funne meg att,

kjære ven.

Og så kan me sitja saman i lag

med lyse og gode tankar.

(ABM 20.01.2018)

                                              

 

Sløkk ljoset før du går

Tenk å vera langt av lei

å sitja litt i fred og ro

på trappa ved Montmartre

å vandra i den gamle by

i Roma og Berlin.

 

Å vera langt der borte

på torget i Tasjkent

og vandra rundt i Istanbul. 

Slik tenkjer eg i stolen min

og har det trass alt bra

til dess eg tenkjer reisa meg

då høgg ei smerte til

 

Eg tenkjer litt på alle dei

i denne vide verd

som smertar mykje meir enn eg

og ikkje har dei heim og mat

og ingen stad å dra

(ABM 19.01.2018)

 

 

                                              

Til alle tider

 

Med huva i handa

kan me få koma inn

nei det er ikkje plass

i herbyrget

de kan vera i stallen

 

Med huva i handa

tenk om eg kunne

få koma inn

sa jenta med

svovelstikkene

ho tende den

siste stikka og

breidde snøen over seg

 

Med huva i handa

kan me få koma inn

me svelt og lir vondt

og det er krig

nei det er ikkje plass

i landet vårt

reis din veg

til dømes heim att

 

Med huva i handa

kan me få vera her

me har vore her alltid

nei landet er vårt

reis over elva

 

Med huva i handa

me jagar deg ut

og byggjer ein mur

me vil aldri sjå deg meir

 

Mennesket er seg sjølv

til alle tider

dei fleste må stå

med huva i handa

(ABM 17.01.2018)

historietime

 

tanken om å vera god

ser me ikkje mykje av

dei som styrer

tenkjer på seg sjølv

pengar og makt 

dei som ynskjer å vera gode

har ikkje pengar

og ikkje makt

 

tanken om å vera barmhjertig

har dårlege kår

det svarar seg ikkje for dei

som har pengar og makt

 

tanken om å vera miskunnsam

dei skjønar ikkje ordet dei

som har pengar og makt

 

tanken om å venda det andre

kinnet til

har dei ikkje høyrt om dei

som har pengar og makt

 

endåtil Jesus Krist

som sa han var guds son

og fortalde oss desse orda

måtte gje tapt for dei

som har makt og pengar

 

slik går dagane

den heile historia

(ABM 16.01.2018)

                 

 

 

Smertelindring

 

 Du sit i stolen heilt i ro

smertene er borte no. 

 

Du drøymer om å gå og gå

langs strendene

i skogen og i fjella.

 

 

Vinden krusar vatnet

du ser det inne i deg sjølv

eit bilde klårt og skarpt.

 

 

Det gråe lyset raudnar litt

når sola ho går ned

og natta stundar til.

 

(ABM 15.01.2018)