Åra går

No har eg blitt 70 år. Eg sat nett og skreiv takkebrev til dei som var med på 70 årsfeiringa mi. Då tenkte eg på den lange historia som me alle er ein del av.
I 1965 fann ein gammal mann på Mæle, der eg har namnet mitt frå, eit lite stykke papir der dei hadde teikna opp korleis husa på Mæle stod før utskiftinga i 1890 åra.
Eg teikna det av så nøyaktig som råd var, og malte eit bilde av det gamle klyngetunet Mæle.
Bestefar min voks opp i huset som du ser så vidt i høgre kanten.Huset hadde jordgolv.

Klyngetunet stod oppe på ei gammal bygdeborg frå om lag 400 talet. Tidene må ha vore urolege, truleg i over tusen år,  sidan folket bygde husa sine inne i bygdeborga, eller nærast råd.

Stå no opp

til ein ny dag.

Sommarljos

over fjella.

Tåkedisen

løyser seg.

Det hastar med

slåttonna.

Skunda – Skunda

Stå no opp

til ein ny dag.

Jakta på bjørnen

som slo sauen.

Skunda – Skunda

Stå no opp

til ein ny dag.

Høyrer

våpengny

i Hestagåtå.

Finn fram

sverdet og øksa

til me veit

kven dei er.

Skunda – Skunda 

(ABM 1965)