sei noko til meg før dagen er omme

 

det inste i meg

langt der inne

som eg ikkje styrer

som kjem fram

med ord og bilde

som eg skriv

og teiknar

 

seier ingen ting no

 

eit grått teppe

inne i meg stengjer

i dag malte eg eit

stormpiska hav og

ei tremasta seglskute

eg trur eg prøvde å få

det inste  i meg til å

vakna opp og sei noko

 

håvard 5 år spurde

besten er du ferdig

med bildet

ja har du lyst på bildet

ja takk eg vil ha det

på rommet mitt

 

haustdagen går mot

kveld no

sei noko til meg

før dagen er omme

og det kalde mørket

legg seg

langs strendene.

 

(ABM 07.10.2017)