Ord i dag 29.08.2018

Eg eig ikkje tida.

Eg låner berre

eit lite sekund.

 

Eg eig ikkje jorda.

Eg låner berre ein liten bit.

 

Eg eig ikkje deg, min kjære.

Berre ei lita stund,

er me saman

her på jorda,

du og eg.

 

Alt som me låner,

må me ta oss i vare

og gleda oss over,

kvar einaste dag.

 

Alt som me låner

skal me gje vidare snart.

Til dei som kjem etter.

 

Eg lurer litt på i dag,

-med all redsel og gru

rundtomkring-

om dette er noko me greier.

(ABM 29.08.18)

 

 

Ord i dag 18. august 2018

Rosene utanfor vindauga mitt

heng våte og pjuskete

i regnet og vinden.

 

Hausten nærmar seg

og båten må snart på land.

No er det slutt på den gode tida

med varme og

den milde lufta

om kvelden.

 

Eg gruar meg til

vinterdagen

med mørke og regn i vente.

 

Kanskje kan eg setja opp

eit stort lerret på

staffeliet

og mala sola som skimrar

kring båten min

ute på sjøen.

(ABM 18.08.2018)

Oktober

Det mørknar mot oktoberkveld

ein stad langs svarte stranda.

 

Me sit heilt still i båten vår

i natta mørk og grå.

 

Mens lyset over himlen går

frå her til alle landa.

 

Eg tenkjer på

at du ser same lyset nå

langt langt borte herifra.

(ABM 19.10.2015)

                                                                               

                                                                                 

Ord i dag 10.08.2018

Dra opp landgangen.

No kastar me loss

og seglar ut på det

store havet.

 

Me veit ikkje vegen

og kvar ferda går.

 

Det er mange no

som står med kofferten

i handa

og drar ut

for første gang.

 

Eg hugsar eg var 17 år

og hadde fått hybel

I Bergen - i Øvregaten.

 

Eg hadde ein koffert

og ei veske.

 

I kofferten hadde eg

litt klede

ein brunost

eit stykke kvitost

eit glas med syltetøy

og eit brød.

I veska hadde eg ingen ting.

 

Eg vart ikkje verdensmeister

i  noko fag.

Men eg lærte å meistra

livet mitt.

 

Saman med gode vener

hyggelege lærarar

og ho som eg blei

kjærasten med.

 

Å meistra livet

den viktigaste lærdomen

av alt det viktige.

 

Når du er 17 år med

ein koffert og ei veske

på busstasjonen i Bergen

ein augustkveld.

(ABM 10.08.2018)