28.02.2018: Ord i dag

I dag skin sola

og det er kaldt.

 

Presidenten smiler

og bombar folket sitt.

Og det er alt.

 

Det einaste eg orkar

er å rydda litt

i rotet mitt.

(ABM 28.02.2018)

                            
                                                                            

27. februar 2018: Ord i dag

Det er møysommeleg

å byggja demokrati.

Møysommeleg å forstå

kva solidaritet er

og kva likskap tyder.

 

Det er enkelt å bryta

ned demokratiet.

Folk som vil ha makt

og pengar for einkvar pris.

 

Dei skrotar verdiar.

Dei skrotar menneske

dei ikkje vil ha

Dei skrotar lovene

som ikkje passar i diktaturet.

Dei skrotar dyktige folk

og set inn nikkedokker.

 

Dette fortel historia oss.

Men me lærar aldri.

(ABM 27.02.20.18)

Teikna av barn 6 år.

 

26. februar 2018: Ord i dag

I dag snøar det, og kulden bit.Det er lenge til

liljekonvallar og

engsoleier strålar.

 

Eg trur eg finn fram penselen

og malar eit bilde

av sommaren

der fargane

hopar seg opp.

 

Då kan vinteren gå sin gang

til han blir borte

av seg sjølv.

(ABM 26.02.2018)

25. februar 2018: Ord i dag

når regjeringa gjev ordre om å henta

flyktningar ut or guds hus

 

når regjeringa vil utvida

fullmaktslovene til å gjelda

i fredstid

 

når regjeringa gjev pengar

til dei rike

og tar frå dei fattige

 

då lever me i ein stat

me ikkje likar

å samanlikna oss med

(ABM 25.02.2018)

                                                       Teikna av barn 6 år   

24. februar 2018: Ord i dag

Gje meg ein tone i kveld.

Frå seglet som strammar og slår

og bølgjer som klukkar og får

båten min trygt inn til land.

Ein stad som eg ikkje veit om.

 

Der skal eg leggja meg

sakte til kai og spørja

kvar er eg no.

 

Gje meg tonen i kveld

når eg snakkar med deg.

Eg veit du vil sei noko

viktig til meg.

(ABM 24.02.2018)

                    
                                                                           

   

23.februar 2018: Ord i dag

I dag skal eg ut og fanga solstrålar.

Våren nærmar seg

 

 

og eg ser dei.

 

Då kan eg sei til dokteren på kontroll.

Hofta blir nok betre no.

Eg fanga solstrålar i dag.

(ABM 23.02.2018)

22. februar 2018: Ord for dagen

Kan henda fortener

dei rikaste å bli rikare.

Kan henda fortener

dei fattigaste å bli fattigare.

 

Det seier Trump, Solberg,

Jensen og Listhaug.

Og alle som stemmer på dei.

Og heiar på dei.

 

Slik går denne dagen også.

Eg er flau på dine vegne

som har mist det vesle

du hadde.

(ABM 22.02.2018)

                                           Teikna av eit barn 6 år                

21. februar 2018: Ord i dag

Forventningane uroar meg.

Om ljoset og sola som stig

strålande over fjella i aust.

 

Men eg sit heilt still i dag.

Eg kan ikkje gå ut i det

skirande morgonljoset.

Mange har det slik.

 

Skal tru om nokon vil sjå

inn til meg

Så kan me mala eit bilde

av dagen som gryr

og strålar fram.

(ABM 21.02.2018)

                                               

                                                             

20. februar 2018: Ord i dag

Skammeleg, skammeleg.

I dag melder dei at justisministeren

set ned eit utval

som skal greia ut

at regjeringa får vidare fullmakter.

 

Til å styra og jaga på folk.

Demokratiet forvitrar.

Og despotane vinn fram.

Skammeleg, skammeleg.

(ABM 20.02.2018)

 

Teikna av eit barn 6 år

 

19. februar 2018: Ord i dag

han stod i ruinane og sa

no er alle lei av krig

sa han om att og om att

 

eg tenkte med meg sjølv

kvar kjem krigen ifrå

kven lagar krig med vilje

 

historia fortel meg

at det er alltid er nokon

som vil laga krig

kvifor finn me dei ikkje

desse personane i tide

og får dei på andre tankar

(ABM 19.02.2018)

                                                    Teikna av gut 6 år             

18. februar 2018: Ord i dag

I dag skin sola, og det lysnar no.

Kjøttmeisa sit på matposen heilt ro.

 

Gje meg eit bilde frå fjord og sjø.

Så kan me kvila i fred me to.

 

Drøyma oss vekk til framande land.

Kanskje finn me det ein gong.

Det som me ser etter no.

(ABM 18.02.2018)

                                                           
                                                           

          

17.02.2018: Ord i dag

Tenk om eg kunne finna

eit ord som gjer at alle gler seg.

 

Glade fargar og gilde bokstavar.

 

Gulgledefangst.

 

Så kan alle tenkja på.

Kva betyr det for meg.

(ABM 17.02.2018)

16. februar 2018: Ord for dagen

Vadlasletta og snø i lufta.

Postbilen fer forbi.

 

Eg set meg litt til rette i stolen no.

Og er glad eg kan ta det med ro.

 

Eg høyrer på radioen lite grann.

Krig og ufred er som før.

Folk dei snakkar om mange land.

 

No trur eg eg skrur radioen av.

Les i boka mi og gløymer mas og kav.

(ABM 16.02.2018)

 

 

15. februar 2018: Ord i dag

I dag sit eg inne i fred og ro.

Mens stormen ular forbi.

 

Eg trur me kan sitja i stolen i dag.

Så tenkjer me tankar i lag.

 

Den store tanken er fred på jord.

Den kan me gløyma, kjære.

 

Trur du nokon hugsar det.

Når det var fred i alle land.

Kanskje er det muligens

fleire enn oss

som grublar litt på det?

(ABM 15.02.2018)

                                           

14. februar 2018: Ord i dag

Fjorden går kvit i dag.

Skyene hopar seg opp i lag.

 

Vinteren går mot slutten no,

og uroa inni meg held seg i ro.

 

Flyttfuglane samlar seg langt i sør.

Eg gler meg til dei i tunet trør.

(ABM 14.02.2018)

                                 
                                                 

13. februar 2018. Ord i dag

 

I dag skin sola over taket

Til naboen vår.

For første gong i år.

På verandaen og inn i stova. 

Måkane ligg på vinden

og våren er snart på gang.

(ABM 13.02.2018)

 

                                   

 

 

 

 

 

12. februar 2018: Ord i dag

Fjell og fjorden

gøymer seg. 

Snøen laver ned.

Hofta plagar meg.

No vil eg snarleg

vera med.

 

Eit enkelt ord i dag.

Men dersom gnisten

i meg vinn

så kjem dei lag på lag.

(ABM 12.02.2018)

 

 

 

Det nye ljoset og forventningane

Aninga av ljos over himmelen.

Speglar fjorden og dei høgaste fjella.

 

Ljoset og den nye dagen finn du

i speglingane over himmelen.

 

Slik er det også med oss alle.

Ljoset, livet og forventningane finn oss

når dagen gryr.

(ABM   25.09.06)