Ord i dag 28.07.2014

eg liker å sitja ved

hjørnebordet

eller på

hjørnepulten

 

der kjenner eg meg

trygg og god

og kan sitja heilt i ro

tenkja mine eigne

tankar

 

eller lytta om

du inste langt inne

i meg sjølv

kjem fram med

tankar ord og bilde

 

i dag klarte eg

endeleg å vandra

eit stykke langs elva

i fjellet

til ein foss

og berget

var som eit hjørne

eit hjørneberg

 

der sat seg

trygg og god

i mild og luftig

solgangsbris

og kjøleg fossebrus

 

og tenkte litt på

ingenting

i fred og ro

(ABM 28.07.2018)

Ord i dag 26.07.2018

 

Mild solgangsbris

på Hardangervidda.

 

Endåtil fiskane i elva

har gått til ro.

Eg og har gått til ro

med kaffikopp og skive.

 

Dei slake liene og fossen.

Her vil eg sitja

til sola går ned.

 

Den sjeldne dagen.

 

Og elles skjer det ingen ting.

(ABM 26.07.2018)

Å vera langt unna

22.juli 2011 var eg langt inne i Sunnmørsalpane. Det var ikkje telefon- eller radiosamband. Etter kvart høyrde me rykte om det som hende i Oslo og på Utøya. Då sykla eg ned frå fjellet til ein plass der det var telefonsamband. Eg høyrde kva som hadde hendt, og nokre dagar etterpå skreiv eg diktet nedanfor og malte bildet.

22.07.11

Eg sykla ned frå fjellet

for å snakka i mobil.

Me høyrde rykte om

det vonde.

Alle som var  døde.

Var det hundre?

Eg berre stod.

Med telefonen

i handa.

 

Lenge

 

Fjella er like bratte

og fossen durar

like sterkt.

Men set kryss

over tjueandre juli.

Set kryss over.

Set kryss over.

 

Set kryss over

gjerningsmannen

og dei som har

leia han på vegen

og styrka han

 i galskapen.

 

Etterpå skal

tjueandre juli

leva inne i oss alle.

Brenna og

halda oss vakne

(ABM 25.07.11)

 

 

ord i dag 18.07.2018

på trappa

ved Al Aksa moskeen

og Salomos tempel

og med tankane mine

 

den lange historia

frå Abraham

til 18. juli 2018

og alle folkeslag

der i området omkring

i Syria, Iran,

Libanon, Israel, Egypt

og mange fleire

 

i krig med kvarandre

for guden sin

fortalde dei

 

dei drap og herja

og gjer det framleis

 

kven har skulda

 

på trappa

ved Al Aksa moskeen

og Salomos tempel

og undrar meg

(ABM 18.07.2018)

Ankerfeste

Stormen uler og dreg i segla.

Me slingrar ute på havet.

 

Endeleg sklir me inn i ei vik

bortgøymd og skjerma

for vinden og kavet.

 

Så kastar me ankeret

Inne ved stranda

langt borte frå ver og vind.

 

Her kan me liggja

og snakka i lag

heilt til det gryr av dag

(ABM 27.02.2018)

 

 

Vegen mot havet

 

Alt og alle startar ein stad.

Elva – ein ørliten bekk.

 

Du også – langt inne i deg -

i det inste.

Kjære – ver med meg på ferda.

 

Så veks det fram

gjennom fossar og stryk,

og stille langs skogen og lia.

 

Det inste fortel deg om verda

som du i livet ditt gjekk.

(ABM 15.04.2018)

 

eg leitar etter deg alle dagar

det mørke og det lyse skifter

og glir over i

kvarandre

også i det inste i meg

 

det kjem fram

det lyse

og gjer meg glad

det mørke

som fargar lyset svart

 

den mørke himmelen

og det skirande kvite

dei lange tomme

viddene

 

endåtil då ser eg deg

kjære

i lyset som skimrar

(ABM 01.05.2017)

 

 

Draumen

Eg drøymde i natta

om fjorden min.

Der sat me i fjæra

og snakka i lag –

eller på sjøen i båten din

heilt til det grydde av dag.

 

Eg drøymde om

himmel og hav

i fargar så blå.

Fargane elles

var nye for meg.

Gje meg penselen din

når du går.

(ABM 15.04.2018)

 

 

Ord i dag 02.07.2018

I dag er det strålande

sol og sommar.

 

Men eg ser fram til

det gråe ljoset

og dei mørke skyene

over fjella.

Tåkedis i liene.

 

Eg gler meg til hausten.

Kanskje har smertene

sleppt taket.

Då vil eg tola

regnet, vinden

og tunge skyer.

 

Så går eg over myrene

opp liene

og til den høgaste toppen.

 

Der skal eg stå

og gle meg.

(ABM 02.07.18)