Ord i dag 29.06.2018

 

Lotteriet

 

Syrinbuska utanfor vindauga

har blomstra av.

Vinden puslar i lauvet.

 

Eg har sett på syrinbuska

snart eit år no.

 

Eg tapte lotteriet.

 

Slik er det i livet.

Heile tida er det lotteri

du ikkje veit om.

 

Av og til taper du

og av og til vinn du.

(ABM 29.06.2018)

Ord i dag 28.06.18

Dei viktige orda

 

Blekket tørkar

og orda står fast.

 

Ord eg tenkjer.

Ord eg seier.

Ord eg høyrer.

Ord eg føler.

 

Står fast når eg

har skrive dei ned

og blekket har tørka.

 

Men det usagde ordet

som eg aldri sa

til deg

veit eg er der

mellom oss.

 

Du veit det du også

kjære

når kvelden er nær.

(ABM 28.06.2108)

 

Ord i dag 27.06.2018

Stengt inntil vidare

 

Kontoret er nå stengt,

sa du.

 

Tenk om alle

kan seia det.

 

No er eg stengt

og opnar att

om to timar

om to dagar

eller kanskje

om to år.

 

Då kunne eg

sitja heilt roleg

å sjå ut i det

tomme

himmelrommet.

 

Eller kanskje innover

i meg sjølv

til det inste.

 

Då kan eg spørja

om alle ting.

Og det inste fortel

meg kanskje

noko om livet

og om den

strålande kvelden

eg skal sitja

å vaka med deg

og snakka om

gode ting.

(ABM 27.06.2018)

 

 

 

 

Ord i dag 25.06.2018

I dag fann eg kladden til eit dikt

som eg skreiv i september 2016.

 

Ha ein god dag

19. september 2016

21 grader i hagen vår

kl 22.

 

Den varme lufta

vaker rundt meg.

Omsluttar meg

og blomane og alt

som er rundt meg.

 

Tenk om me kunne

sitja i det varme mørket

og snakka om

alvorlege ting.

 

Du og eg og alle

utan unnatak.

Sitja der og sei

at no er det slutt

på alle krigane

og alt vondt

 

Hjelpe meg.

21 grader i hagen vår

kl 22 19. september 2016.

(ABM 25.06.2018)

 

 

Ord i dag. 20. juni 2018

livet er så mangt

 

stundom innimellom

snur livet vranga til

 

då finn du meg ein stad

som lindrar og som døyver

 

framfor staffeli med penslar

og klare sterke fargar hopa opp

 

vandra rundt så langt og lenge

 

 

som kroppen toler

der i fjellet som eg saknar sårt

 

sitja stilt i ro og sjå på sjøen

eg veit så godt eg finn deg att

 

ein dag for lenge lenge sidan

då var du med på denne ferda

langs fjordane og høge fjell

 

eg veit eg går der enno

med deg ein gong

når livet det har snudd

(ABM 20.06.2018)

Ord i dag. 17. juni 2018

Det blå lyset

over kvinnheradsfjella.

Tonar bakover i ulike

blåtonar.

Stille og uendeleg.

 

Denne underlege timen

før dagen startar.

 

Eg sit i stolen

og kjenner

at smertene likar meg

i dag også.

 

Snart snur sola

og hausten er nær.

 

Tenk om både

smertene mine

og sola snur.

Til det betre

får me tru.

(ABM 17.06.2018)

 

 

Ord i dag 14. juni 2018

draumen lever ennå

 

å sitja i båten tidleg i morgongry

 

å føla at strendene, sjøen og lia

er der på ny

 

å kjenna at stormane stilnar

langt inne i det inste

 

å pusla med snøret

om fisken bit

gjer ikkje det minste

(ABM 14.06.2018

 

 

ord i dag 13. juni 2018

pianodagen

 

det var ein god dag

eg spelar piano

 

du henta meg

 

eg spelar piano

den fullsette salen

eg sette meg ned

 

fingrane flaug

over dei svarte og

kvite tengentane

 

lydlaust

i lause lufta

(ABM 13.06.2018)

 

 

Ord i dag 10.06.2018

Det startar noko nytt

kvar morgonstund.

 

Ljoset over fjella

langt der borte.

 

Dagen kjem

med godt og vondt.

 

Kanskje veit du

kva som skjer.

 

Men ofte er det slik

at du må venta

og venta

og vona på det best.

(ABM 10.06.2018)

 

 

ord i dag 09.06.2018

eg fekk adressa

til ei som eg leika

saman med

gjekk på skulen i lag

frå me var fem år

til me var tolv år 

då flytta ho

eg hugsar

mange gleder

og ei sorg

over at ho flytta 

no er me 74 år

ho ringde til meg

i går

forunderleg

det var nett

som om me heldt

fram samtalen

(ABM 09.06.2018)

 

 

Ord i dag. 08.juni 2018

Ein stille dag

 

Spreidde skyer

sig over himmelen.

Strålande ver i dag.

 

Men eg er på veg

til andre ting.

 

Eg badar ikkje i dag,

og båten ligg i hamn.

 

Av og til er livet slik.

Den vrange sida fram.

(ABM 08.05.2018)

ord i dag. 7. juni 2018

dagane går

 

dagane går sin gang

den eine dagen

med glede og gode ting

 

den andre dagen

mørknar det

av alt som skjer

av uver

storm og

styggeskap

 

men uansett

kor det ser ut

så ljosnar det ein gong

og sola skin

i lia langt der borte

 

då gløymer eg det mørke

inni meg

for sola lyser snart

i stoveglaset mitt.

(ABM 07.06.2018)